“وكالات- وطن”- آخر الصرعات في مصر “متوفر بلطجي ليرد لك حقوقك”، هذا ما تتضمنه صفحة انتشرت على موقع التواصل الاجتماعي فيس بوك، صفحة تحمل اسم “السراج لأعمال البلطجة واستخلاص الحقوق”، وتتخصص الصفحة بتقديم العون لاستعادة حقوق المظلومين، عن طريق استئجار بلطجية بمقابل مادي، وأعلنت عن تسعيرة، مع وجود تخفيضات بمناسبة شهر رمضان.
وبررت الصفحة تأسيسها بأن القانون لا يحمي أحدا، وكتب الأدمن: “عشان إحنا في بلد مفهاش قانون يحميك أو يجبلك حقك.. لو عربيتك اتسرقت الشرطة ما بترجعهاش.. لو حد وقفك في الشارع وخد فلوسك محدش هيحميك.. لو أي حد أطول أو أكبر أو عنده ناس أكتر منك يقدر ما يدكش حقك.. وياكل عليك فلوس أيا كان”.
وتابع: “علشان ما تعرفش تركن عربيتك تحت البيت، علشان عندك جار بيضرب برشام، وواخد المكان عافية، علشان سواق الميكروباص يزود الأجرة عليك، ولو مش عجبك هتتشتم وتنزل”.
وأضاف: “باختصار علشان إحنا بلد أكل الحقوق.. بلد القوي بياكل الضعيف.. إحنا قررنا إننا مش هنسيب حق حد إلا لما نرجعه. وبمناسبة شهر رمضان، عملنا تخفيضات شوية على الأسعار بتاعتنا، ودلوقتي لو فيه جار ليك بيبلطج عليك، ومش عايزك تركن العربية بتاعتك، أو بيبوظلك أي حاجة في الشقة أو العمارة، تقدر تاخد حقك منه، ولو فيه حد خبطلك عربيتك، وما رضاش يصلحهالك، سواق ميكروباص خبطك، شتمك، سرقك، أي حاجه، تقدر تبعتلنا، وإحنا هناخدلك حقك في وقت أقل من أسبوع”.
ونشر أدمن الصفحة تسعيرات أعمال البلطجة، مع تخفيضات خاصة بمناسبة شهر رمضان الكريم، مؤكدا أنه لا يعمل إلا مع المظلومين أو المهدور حقهم.
يذكر أن وزارة الداخلية المصرية تلاحق صاحب الصفحة.